Կարճ, բայց տեղեկություններով ու արկածներով լի այս փաթեթի առաջին էքսկուրսիոն օրը կսկսենք Խոր Վիրապի վանքից, որտեղ 13 տարի բանտարկված է եղել հայոց առաջին կաթողիկոս և համաքրիստոնեական սուրբ Գրիգոր Լուսավորիչը։ Շարունակելով օրը՝ կայցելելենք հայոց հոգևոր կենտրոն Էջմիածին։ Առաջին կարճ կանգառը կունենանք Սբ․ Հռիփսիմե եկեղեցում, որտեղ ամփոփված են համաքրիստոնեական սրբի՝ Սուրբ Հռիփսիմեի մասունքները։ Այնուհետև կլինենք Մայր տաճարում, որը կառուցվել է 4-րդ դարում և համարվում է աշխարհի առաջին քրիստոնեական տաճարներից մեկը։ Օրը կամփոփենք Մաչանենց տուրիզմի կենտրոնում, որը տալիս է լավագույն հնարավորությունը ծանոթանալու հայկական ազգային կոլորիտին մեկ վայրում․ այստեղ մեր հյուրերը կարող են լավաշ թխել թոնրի մեջ, պատրաստել տարբեր կավե իրեր, մասնակցել ազգային կերակուրների պատրաստման վարպետության դասերին և օգտվել Մաչանենց ռեստորանի ազգային ու հեղինակային խոհանոցից։

Հայաստանը բացահայտելու հետքերով երկրորդ օրը կհայտնվենք Գառնիում։ Առաջին կանգառը կունենանք Չարենցի կամարի մոտ, որտեղից հրաշալի տեսարան է բացվում դեպի Բիբլիական Արարատ։ Տեղացիների խոսքով՝ կամարը կարծես նկարի շրջանակ լինի լեռան համար։ Հաջորդ կանգառը կլինի Գեղարդի վիմափոր եկեղեցիներով հայտնի վանքը,  որտեղ երկար տարիներ պահվել է համաքրիստոնեական սրբություն համարվող Սուրբ Գեղարդը։ Այնուհետև կայցելենք Գառնու տաճար, որը Հայաստանում պահպանված միակ հեթանոսական տաճարն է և իր գեղեցկությամբ համեմատվում է հունական տաճարների հետ։ Օրվա վերջում կուղևորվենք դեպի Սևանա լիճ, կբարձրանանք թերակղզի և կայցելենք 9-րդ դարին թվագրվող Սևանավանք: Օրը կամփոփենք ափամերձ հարմարավետ միջավայրում՝ վայելելով լճի զովությունն ու տեղական համեղ խոհանոցը:

Կարճ շրջագայության  վերջին օրը կանցկացնենք Հայաստանի մայրաքաղաք Երևանում, որտեղ կծանոթանանք երևանյան հյուրընկալ մթնոլորտին, կտեսնենք քաղաքում գտնվող ամենահայտնի վայրերն ու կլսենք դրանց պատմությունները։ Հիմնական էքսկուրսիայից հետո կայցելենք Երևանի ամենակոլորիտային շուկաներից մեկը՝ Գումի շուկա․ այստեղ կփորձենք տարբեր մրգեր ու ազգային անուշեղեններ։ Էքսկուրսիոն օրը կավարտենք Վերնիսաժում, որտեղ ցուցադրվում և վաճառվում են հայ նկարիչների և վարպետների գործեր՝ կտավներ, հուշանվերներ, զարդեր, գորգեր և այլն։